€48.526!!!

D'r is aafgelaupe zaoterdaag maar leefs €48.526 opgehaold beej 't 7de Kika-konsert! 'nne Aovend wao artieste belangeloos optraeje um d'r veur 't publiek 'nne moeie aovend van te make, maar veural um geld in te zamele veur 't gooje doel: Kika; Kinder kankervreej. 't Waas moei te meuge doon, same met os 'zengersvrinde' Fred en Bart. Prachtig det d'r zoëvuul cente op zien gehaold veur kinder die 't KEI hard nuuëdig hebbe.

Kika danke! miér info www.kikalimburg.nl

Kika!

Komende zaoterdaag meuge weej weer. Centjes ophaole veur kinder die 't hard nuuëdig hebbe. Veur de artieste 'nne aovend um misschien waal ens éch waat te meuge beteikene. Kika. In 't Raodhoés, zaoterdaag d'n 31ste, kaarte beej 't Raodhoés. Wies zaoterdaag...doot noow maar.

Tabee

Gedaon, aaf oét, veurbeej, gewaes...En maar good auk...weej bedoele, d'r mot ein ind aan komme. Fantastische tiéd dae begint op 11/11 en sluut um 24:00 oor op vastelaovesdinsdaag. Bedank aan idderein: prinse (met adjes), publiek beej optraejes, vastelaovesvereiniginge, maar baove-al de vasteloavesviérder, want dae makde d'r same met os weer 'nne biezondere vastelaovend van! Zeen os. Wies gauw. Danke.

Bram&Ruud

Prachtig leedje...

Kiek heej man, aaf en toe hebse as argeloze laezer toch wal mazzel huur. De link heejonder guuef toegang tot ein niej leedje van de Hofbalband met as zangers, JP Joëste, Lex, Bartje H, Marco Schell en Fransje P. Inspirasie kump oet 't book van Jan van Mersbergen euver vastelaovend: Naar de overkant van de nacht. Vreej te downlaode, woehoew!

http://www.jocusvenlo.nl/documenten/D'n%20euverkant%20van%20de%20nach.mp3 

Veurs en taeges van 't LVK

't is netuurlik neet de vraog of d'r waer discussie kump euver 't gooije en slechte van 't LVK maar wenier det percies gebeurt. Jos Boute, dae jaore langk in de zjurie in Noord Limburg zoot een noow tot de journaliste-zjurie behuurt goeijde de spraekwoordelijke knuppel in 't hoenderhok door te stelle det de lokale eigenheid van de leedjes d'r vanaaf is en det 't LVK det schöld is. Direk daonao woort Jos neergezatte as economieriddakteur zonder verstand van meziek. Noow wille weej neet zegge det economieriddakteure per definitie verstand van meziek hebbe maar Jos haet vuul ervaring in de zjurie en luuet altied blieke ein gooije onderbouwde meining euver meziek en leedjes te hebbe. We motte 'm in dit geval dus erg serieus neme.

Waat vaerder opvelt is det hae in zien stök schrief euver 't feit det leedjes allein maar vlakke algemeine illemente bevatte. Dao zien weej 't veur ein deil mei ins maar um te zegge det det iets van noow is klop netuurlik neet. 'Had ik Maar, Josefien, Minse wie weej. Allemaol van 't zelfde lake as pakweg Heej blief ik plekke. Universeel, net zoe Venloos as Limburgs maar dan wal in ein eige specifieke dialek. Dao zit 'm 't onderscheidende gedeilte. 

Wao weej 't veur ein groeët deil wal mei ins zien is det d'r soms puur en allein veur 't LVK geschreve wuurt. En eigelik is det jaomer want de stichting LVK zag altied te waardere det minse juus dich beej eur eige vastelaovescultuur bleve. Discussie euver 't verplich met succes meidoon aan leedjeswedstriede alveures nao 't LVK te kinne zien dan auk zinvol. Dan stimuleerse det auk een bietje. 

Vaerder is veural 't bonnesysteem d'r netuurlik debet aan det lokale leedjes neet in de finale komme. Algemeine LVK-leedjes trekke beej 't groëte publiek op veurhand mier stumme. Toch zitte d'r auk dök pareltjes tösse de lokale leedjes die van de vakzjurie auk nog ens  vuul punte kriege. Toch kinne zeej noeits op taege de giga struim aan bonne en smsse oet hechte kerne en van de giga-fenklups. As stichting LVK kinse nog truuk maar dan mosse wal vuul serieuzer laote blieke det inhaldelijke kwaliteit dich waat waerd is. Allein vrolijkheid en remmiedemmie is netuurlik neet genog. Zeker asse zon status hebs as 't LVK. Dan kinse dich dich permittere um de kwaliteit baove de kwantiteit te stelle. Doon dus!

> Niejsarchief