Biografie

Ut Optochleed is en blief altiéd ut vertrekpunt veur ôs. 2002, jông jônge die eigelik niks van ut zinge van vastelaovesleedjes aaf wiste. Weej kôste de vastelaovesleedjes netuurlijk wal maar d'r zelf staon det is toch waat anders. Inens ein sms-je van vrind Frans Pollux: "Leedje op de leedjesaovend zinge"? Weej hadde ech wal podiumvrees. Des te bleuder is ut eigelik det weej dao iérste woorte. Inens bisse vastelaoveszenger. Ut winne van de leedjesaovend is daonao nog twië kier gelök, Olms (2006-2007) waat weej same zonge met Herm en Bert en met Hallekiedallekiedeej (2008-2009). Daonaeve hebbe weej auk in Blierick enne kier meuge winne. Klapstök is netuurlijk de iérste plek op ut LVK in 2008. Eigelik zien weej verwinde jônge. Maar ut blief zoe ontzettend tôf um op de buun te staon en te probere um de minse gans los te kriege. Weej kinne os eigelik neet ech mierein laeve zônder zinge veurstelle. Met excuses veur de maedjes die dök allein môtte zien. Maar met dank aan de gooije schriévers Peter, Wim en Frans, arrangeurs Jan en Emmanuel Theelen, Jocus, De Wortelepin, stichting LVK en veural de minse die nao de leedjes luustere.

Bram euver Ruud

Tja, met Ruud velt eigelik hiel good te laeve. ’t Is zo’nne kaerel wao-se van opaan kins. As d’r zake geregeld motte waere dan duit hae det. Daorum auk det hae altiéd de geluudsband meineemp want ik zoel die waorschiénlik zeve kier gaon vergaete. Ruud is emus dae eigelik euveral waal waat van wet. Ingelaeze is en ein gooj meining haet die öges op gebaseerd is. Vandao auk det hae met hard werke en ervaring opdoon ’t good veur mekaar haet. Hae verdeent haos net zoë vuul wie mich!

Det Ruud toch nét neet zoë vuul kwaliteite haet as ik is duúdelik, maar mei kump d’r nog waat baove beej um. Zoë bleek hae ’t teniélspeule toch waal onder de kneen te hebbe en isse haufriddakteur gewaore van Umroop Venlo. Netjes!

Same met vruiwke Clim en kiendje Cielke woënde in ein moei Venloos huuske, wao lekkere soep en ein glaas beer gauw op taofel komme. Gangk zoë door…….net wie met dien OB De Woers, voetballe, golfe, zinge, joernalistere, Venloos Alt en genaete van ’t laeve.

 

Ruud euver Bram

Tja, Bram. De kins dr moeilijk mei laeve, maar auk moeilijk zonder. Bram kin ziene mond neet halde, en d'r kump veural grappige en onzinnige informasie oét. Wie anders is det op de buun, dan luuet hae ut aldehoore toch dök aan mich euver. Neem Bram ens mei nao ein kroeg met vraempde minse. As ein saort Cameleon pas hae zich aan wies det hae aan ut ind van de aovend idderein ingepak haet. Ut leefs steit hae dan baove op de bar te zinge. Zoe pak hae uevriges auk alle lierlinge op zien eige Blariacumcollege in tiedes de lesse.

Van Bram kinse moeilijk zegge det hae neet van ut leeve geneet. Neet veur niks hebbe op deze website de foto's van ut begin (2002) d'r aaf gehaold. Bram is namelijk neet ein klein bietje in umvang gegruejd. Hae is geëxplodeerd. Hae mak zelf altiéd gaer de grap det hae twië köp haet en det det hendig is as ein van de twië ut neet duit. Maar wakker ligge duit hae dao bepaold neet van. Hae haelt van zinge, actere, lesgaeve, Venloosch Alt, zaalvoetbal (ut blief veural beej probere), ziene spaarkas, VVV, zien maedje Maud en veural van ut laeve.

Iërelies

2002-2003

Optochleed (teks en meziék Frans Pollux):
1e beej Jocus' Leedjesaovend, (winnaers van de 1e Funs)
3e op ut Limburgs Vastelaovesleedjes Konkoer (LVK)

2003-2004

Prinsverraoje: (teks en meziék Frans Pollux)
4e beej Jocus' Leedjesaovend

2004-2005

Ut Gaasplein: (teks en meziék Frans Pollux)
5e beej Jocus' Leedjesaovend

2005-2006

Ik zoel wal wille maar ik weit neet wie: (teks en meziék Peter en Wim Jans(s)en)
1e beej de Bliérickse Liedjesmatinee

2006-2007

Olms (Ut is wie ut waas) (teks en meziék Frans Pollux)
1e beej Jocus Leedjesaovend (same met Herm en Bert Pollux)

Ein Fluitje van 'nne cent (teks en meziék Peter en Wim Jans(s)en)
4e beej Bliérickse Liedjesmatinee

2007-2008

De Kriebels (teks en meziék Frans Pollux)
3e beej Jocus Leedjesaovend
WINNAAR LVK 2008

2008-2009

Hallekiedallekiedeej! (teks en meziék Frans Pollux)
1e beej Jocus Leedjesaovend