De Plisie zit in de finale!
Jaja, we hebbe 't gehaold. Os leedje 'Meneer de Plisie' geit op 2 oktober meidoon in de finale van de leedjesaovend. "t is trouwes de zevende kier det Bram & Ruud in de finale staon. Ierder gebeurde det met respektievelik 't Optochleed (1e in 2002), Prinsverraoje (4e in 2003), "t Gaasplein (5e in 2004), Olms (1e in 2005), De Kriebels (3e in 2007) en Hallekiedallekiedeej (1e in 2008). Weej zien d'r kei bliej mei en winse alle andere finaliste enne toefte aovend!
"t Groete-Joetjoép-cd-weggaef-projek van Bram & Ruud
Hald og vas. We hebbe wae tied gehad um nao te dinke en det veurspeult meistal weinig goods, behalve noow! "t kommende seizoen gaon we tiedes live-optreejes minse beloéne die Youtube filmpkes online zette van 't optreeje. As weej og filmkes via ozze site doorlinke krieg geej van ôs ein gesigneerd exemplaar van de cd Kriebels thoesgesteurd! Waat mot geej dao veur doon? Tiedes ein tof moment van 't optreeje ein filmke make, det online zette via youtube en de link maile nao info@bramenruud.nl. Zet d'r efkes adres en poskode beej en 't kin zoemaar zien det weej og ein cd-ke gaon steure. Vertel 't door!
25 veur 11
Veur de leedjesveurseleksie van Jocus hebbe zich deze kiër 25 leedjes ingeschreve. 8 Minder as veurig jaor. D'r zit zoëwiezoë ein tendens in det 't aantal leedjes idder jaor umliëg geit. Meuste Bram&Ruud zich in eur iërste jaor (2002, 't Optochleed) nog door maar leefs 55 leedjes haer worstele, ware 't de letste jaore zo'n 35 nummers, is 't aantal veur kommende parkfeesvriédaag op de veurseleksie nog maar 25. Opzich is dees achteroétgangk van 't aantal ingeschreve leedjes gen probleem. 't Motte d'r allein neet nóg minder waere volgend jaor. 11 Leedjes zeen weej dus truuk op de live-oétzending van Jocus' Leedjesaovend op zaoterdaag 2 oktober vanoét de Maaspoort in Venlo. Haopelik zien Bram&Ruud d'r nao eur aafwezigheid van veurig jaor weer beej.
Iërs rippetaere Bram&Ruud op de woensdag veur de veurronde. De seleksie zelf wuurt op vriédaag 27 augustus gehalde.
Sukses allemaol!
De Plisie kump d'raan!
Tradisiegetrouw misse Bram&Ruud idder jaor Parkfeesvriédaag. Zund, maar auk idder jaor met ein gooj raeje: veurseleksie leedjes Jocus. Hebbe d'r zin in! 't Leedje is klaor, opgenaome en opgesteurd. Zoëwaal Ruud as Bam zien ondertösse op vekansie gewaes en weer ready um zich te richte op 't nieje vastelaovesseizoen. Dae begint dus pas ech op vriédaag 27 augustus in 't Ald Weishoés. Entree verbaoje! Wilt geej toch ens zeen wie zo'n veurseleksie geit? steur d'r auk ein in volgend jaor......is leuk. Dae van os geit euver de Plisie.
Bram en Ruud op Twitter (2)
Via Rss feed komme alle niejsberichte op dees website strakkes auk beej alle Bram&Ruud-Twittervolgers terech. Vraog mich neet (en Bram al gaar neet) wie ut technisch allemaol in zien werk geit maar as 't good is praot ik noow genne onzin. Veur de volledigheid: www.twitter.com/bramenruud is de plek um vastelavesniejs en specifiek Bram & Ruud-niejs te kriege. Zeg het voort!
> Niejsarchief
